Voorwaer voorwaer seg ick v, ten si dat yemant herboren wort, hi en mach nyet sien dat rijck gods. [4]Nicodemus seyt tot hem. Hoe? mach een mensche als hi oudt is, weder om gheboren worden? Mach hi gaen weder inden buyck zijns moeders, ende gheboren worden? [5]Ihesus heeft geantwoordt. Voorwaer voorwaer seg ic v: ten si dat yemant weder gheboren wort wtet water ende den geest, hi en mach niet gaen int rijck gods. [6]Datter geboren is wten vleesch, is vleesch, datter gheboren is wten gheest is geest. [7]En wilt nyet verwonderen, dat ic v geseyt hebbe, ghi moet weder geboren worden. [8]Die gheest die blaest daer hi wil, ende ghi hoort zijn stem, mer ghy en weet niet van waer dat hi coemt, oft waer dat hy gaet. Alsoo is al die gheen, die wt den geest geboren is.

B [9]Nicodemus heeft geantwoort, ende sprac tot hem. Hoe moghen dese dingen geschien? [10]Iesus heeft geantwoort, ende sprac tot hem. Sijt ghi een meester in Israel, ende en weet ghi dit niet? [11]Voorwaer voorwaer seg ick v. Dat wi weten, spreken wi, ende dat wij sien, getuygen wi, ende onse getuychnisse en ontfanct ghy niet. Ist dat ic v aertsche dingen gheseyt hebbe, [12]ende en gelooftse niet, hoe soudet ghi gelouen, waert dat ic v hemelsche dingen seyde? [13]Ende nyemant en climt op inden hemel, dan die daer neder geclommen is vanden hemel, dye soon des menschen, welcke is inden hemel. [14]Ende ghelijc als Moyses verheuen heeft dat serpent inde woestijn, also moet verheuen worden die soon des menschen, [15]op dat al die ghene die in hem gelooft, nyet en vergae, mer dat eewige leuen hebbe. *

[16]+ Want also heeft god die werelt bemint dat hi zijn eenige geboren soon gegeuen heeft op dat al die gene die in hem gelooft, nyet en vergae, mer hebbe dat eewighe leuen. [17]Want god en heeft nyet gesonden zijn eenighe soon in dye werelt, om dat hy dye werelt soude verdoemen, C mer op dat de werelt door hem soude behouden worden. [18]Die in hem gelooft, en wert niet geordeelt, mer die niet en gelooft die is nv geordeelt, want hi niet en ghelooft inden naem des eenigen geboren soon gods. [19]Ende dit is dat oordeel, dat licht in die werelt gecomen is, ende die menschen hebben meer lief gehadt die duysternis dan dat licht. Want haer wercken waren quaet. [20]Want al dye ghene die [volgende kolom] quaet doet, haet dat licht, ende en comet by tlicht niet, op dat zijn wercken niet gestraft en worden. [21]Maer die de warachticheyt volbrengt, die coemt by tlicht, op dat zijn wercken openbaer worden, want zij in God ghedaen zijn. *

[22]Hier na is Iesus ghecomen ende zijn discipulen int lant van Iudea, ende woonden daer met haer ende doopte. [23]Ende Ioannes doopte oock in Ennon by Salim, want daer veel waters was, ende si quamen ende worden ghedoopt, [24]want Ioannes en was noch niet in die kercker geworpen.

D [25]+ Ende soo isser een vraech ghecomen wt Ioannes discipulen met die Ioden, van dye reyninghe, [26]ende si zijn ghecomen tot Ioannem, ende hebben hem gheseyt. Rabbi, die met v was ouer die Ioerdaen, die welcken ghi ghetuychnis ghegheuen hebt, siet dese doopt, ende si comen al tot hem. [27]Ioannes heeft gheantwoordt, ende sprack. Een mensch en mach nyet ontfangen, ten si dattet hem wt den hemel ghegheuen wert. [8] [28]Ghi zijt seluer ghetuygen dat ick gheseyt hebbe. Ic en ben Christus niet, maer ic ben voor hem gesonden. [29]Die de bruyt heeft die is bruydegom, ende die vrient des bruydegoms, die daer staet ende hoort hem, verblijt hem met blijscap, om de stemme des bruydegoms. Daer om is mijn blijscap veruult. [30]Hy moet wassen, ende ick moet vermindert worden.

[31]Die van bouen coemt, is bouen al. [9] Die van die aerde is, is aertsch, ende spreect van aerde Die vanden hemel coemt is bouen al. [32]Ende dat hi gesien heuet ende gehoort heuet, betuycht hi, ende zijn getuychnisse en ontfanct nyemant [33]Dye zijn ghetuychnisse ontfanghen heeft, dye heeft hy gheteekent, want God warachtich is. [34]Want die gheen die God ghesonden heeft, dye spreect Gods woorden. Want god en geeft den gheest nyet by een maet. [10] [35]Dye vader heeft lief den soon, ende heeftet al in zijn handt ghegeuen. [36]Die inden soon gelooft dye heeft dat eewighe leuen, maer die den soon nyet en ghelooft, dye en sal dat leuen niet sien, maer die toornicheyt Gods blijft op hem. *